nigar-e-zindagani mein sahaare laut kar aae
fasil-e-sham par raushan sitare laut kar aae

tumhaara sath meri saltanat ka ek khazana tha
tumhaare chhod jaane par khasare laut kar aae

jo dhalti umr ki had par naya ahd-e-wafa bandha
khizaon se bahaaron ke nazare laut kar aae

wo jin ko pyar tha apne watan ke zarre zarre se
wo man ki jholiyon mein kab dulare laut kar aae

na toda rishta-e-ummid tund-o-tez maujon mein
bhanwar mein nakhuda ban kar kinare laut kar aae

charagh-e-nim-jaan ab lad raha hai aakhiri pal se
ghanimat hai mohabbat ke ishaare laut kar aae

main 'tabish' muddaton se barf ki basti ka basi hun
main khush hun meri jaanib jo sharare laut kar aae