nikhar saki hai na gul ki na khar ki surat
bahaar ab ke na aai bahaar ki surat

na jaane kaun si sarsar chali ki gulshan mein
uda diya hamein musht-e-ghubar ki surat

janab-e-shaikh dikhaen mudahanat kaise
na rah gai koi baqi farar ki surat

ye us ke chehre se kuchh bhi pata na chalta tha
ki wo adu ki hai surat ki yar ki surat

tu hai hamara wafadar ya raqib ka hai
dikha de ab to koi aar-par ki surat