numaish-e-rukh-e-rangin-e-yar rahne de
mujhe na chhed gul-e-nau-bahaar rahne de

asir-e-panja-e-gesu-e-yar rahne de
mere nasib mujhe be-qarar rahne de

fareb-khurda-e-rang-e-bahaar rahne de
jo dagh-dar hai dil dagh-dar rahne de

abhi na hosh mein la ai mere nasib thahar
karam-numai-e-daman-e-yar rahne de

abhi jawan hain wo ai ghurur-e-husn bata
samand-e-naz pe un ko sawar rahne de

utha na ab mujhe uth uth ke mere dard-e-jigar
pada hua hun sar-e-ku-e-yar rahne de

khiram-e-naz ke sadqe tere o mast-e-shabab
mite huon ke nishan-e-mazar rahne de

kuchh un ke dil pe asar ho chala hai ai gham-e-ishq
meri mizha ko abhi ashk-bar rahne de

teri wafaen bhi to be-hisab hain 'ahmar'
kisi ke zulm-o-sitam ka shumar rahne de