nur se lakh ikhtilaf karo
azmat-e-mah ka e'tiraf karo

dekhna ho jo husn ghairon ka
apni aankhon se gard saf karo

dair-o-masjid mein kya milega tumhein
kucha-e-yar ka tawaf karo

zindagi mein kise mila hai sukun
gham se dar kar na etakaf karo

soz-e-gham ka waqar hai tum se
aansuon se na tar ghilaf karo

saikdon zakhm hain mere dil par
ab to yaro mujhe muaf karo

maslahat-kesh waqt hai 'wahid'
apni fitrat ke tum khilaf karo