pad jate hain kitne chhaale hathon mein
aate hain phir chand niwale hathon mein

ye to aane wala waqt bataega
kya likkha hai mehndi wale hathon mein

kuchh to apni khatir karna padta hai
patthar hon jab dekhe-bhaale hathon mein

hum bhi apni koshish ka aaghaz karen
hath koi to aa kar dale hathon mein

aur nahin to bas ek raushan si ummid
aisa kuchh asbab utha le hathon mein