pada hun zer-e-qadam khak-e-rahguzar ban kar
jhuka hun main hama-tan us gali mein sar ban kar

nikal gaya meri aankhon se misl-e-khwa-o-khayal
guzar gaya dil-e-raushan se wo nazar ban kar

kitab o khat hi ke dhoke mein rah gae aghyar
wo yar aap hi aaya payam-bar ban kar

kisi ki tegh-e-nigah ne mita diye dhabbe
hamare dagh-e-jigar kat gae sipar ban kar

'mazaq' saqi-e-kausar mujhe sambhaalenge
nashe mein bigdi tabiat meri agar ban kar