padhne ko bahut kuchh hai kitabon ke alawa
kuchh aur padho yar nisabon ke alawa

kya aur bhi kuchh log yahan jaan se guzre
hum ishq-zada khana-kharabon ke alawa

har roz naya roz-e-qayamat hai zamin par
ab yaad nahin kuchh bhi azabon ke alawa

sunte hain koi jogi yahan aaya hua hai
tabir batata hai jo khwabon ke alawa

gar dekh rakha ho to koi hum ko batae
duniya ki haqiqat ko sarabon ke alawa

jo 'naz' ko padhte hain wo phulon ki dukan se
kuchh aur nahin lete gulabon ke alawa