paen jo raushni teri jalwa-gari se hum
ho len qarib aur bhi kuchh be-khudi se hum

kar le qubul-e-husn ke sadqe mein jaan-o-dil
fariyaad kar rahe hain teri dilbari se hum

aisa nasib mera kahan mere ham-zaban
kuchh der baat karte jo hans kar kisi se hum

ai husn mujh ko husn ke sadqe ki bhik de
phailae hath baithe hain kis aajizi se hum

thukrao lakh mujh ko tumhein ikhtiyar hai
phir bhi na baz aaenge is bandagi se hum