pahla sa aashiqi ka wo mear bhi nahin
aur husn ki wo garmi-e-bazar bhi nahin

lillah ab to rukh se utha dijiye naqab
aise mein koi talib-e-didar bhi nahin

sar-basta-raaz-ha-e-haqiqat ki dastan
kahte hain wo jo waqif-e-asrar bhi nahin

apna ajib haal hai zindan-e-dahr mein
aazad bhi nahin hain giraftar bhi nahin

josh-e-junun-e-ishq ko kya nazr dun ki ab
daman-e-zindagi mein koi tar bhi nahin

hai qafila bhi bhatka hua apni rah se
manzil-shanas qafila-salar bhi nahin

dekha hai jab se jalwa-e-ru-e-jamal-e-dost
'musa' ko zindagi se koi pyar bhi nahin