pahle hamari aankh mein binai aai thi
phir is ke baad quwwat-e-goyai aai thi

main apni khastagi se hua aur paedar
meri thakan se mujh mein tawanai aai thi

dil aaj sham se hi use dhundne laga
kal jis ke baad kamre mein tanhai aai thi

wo kis ki naghmagi thi jo daron saron mein thi
rangon mein kis ke rang se ranai aai thi

phir yun hua ki us ko tamannai kar liya
meri taraf jo chashm-e-tamashai aai thi