pahle laga tha hijr mein jaenge jaan se
par ji rahe hain aur wo bhi itminan se

donon ko jode ishq ki nazuk si dor thi
afsos wo bhi tut gai khinch-tan se

phir darmiyan bachega jo wo ishq hi to hai
duniya agar nikal den hum darmiyan se

izhaar karte rahte hain waise to kitne log
achchha lagega par mujhe teri zaban se

awwal to qaede se wahan hum hi aate dost
us ne magar nikal diya imtihan se

mera hi haq mila mujhe ehsan ki tarah
us ne muafi mang li lekin guman se