pahle to zara sa hat ke dekha
us shokh se phir lipat ke dekha

itni bhi buri na thi jo main ne
duniya ko zara sa hat ke dekha

dekha use us ka ho ke aur phir
kya farq padega kat ke dekha

hum jama hue hi ja rahe the
aaram mila jo ghat ke dekha

bas ek hi khwab tha ki jis ko
ta-umr ulat-palat ke dekha

wo aur qarib aa gaya tha
jab main ne zara simat ke dekha

phir dil ne mere gham aur khushi ko
rassi ki tarah se bat ke dekha

kal dub raha tha 'farhat-ehsas'
hum ne bhi tamasha dat ke dekha