pahli nazar mein hi meri nas-nas mein rach gaya
kya jaane us ka kaun sa andaz jach gaya

khush-fahmiyon ke aaina-khanon mein ab abhi
wo kaun hai jo sang-e-malamat se bach gaya

tuta kab aaina ye kisi ko khabar nahin
lekin shikast-e-aks se ek shor mach gaya

sare usul muhr-ba-lab dekhte rahe
jab jhut ki panah mein har ek bach gaya

ek khurduri fasil-e-shab-e-khwab-zar se
phisla jo aaftab to chehra khurach gaya

kuchh is qadar shadid tha tufan-e-tez-rau
gahre samundaron ka bhi pani ulach gaya

jis ki na tab la sake zahrile sanp bhi
kis tarah tujh ko 'kaif' wo zahrab pach gaya