pahlu mein dil hai dard ki duniya kahen jise
par is qadar ujad ki sahra kahen jise

wo roab-e-husn tha ki ban aai na hum se baat
yun haal-e-dil kaha ki na kahna kahen jise

aankhon se dekhne ko to ab bhi hain dekhte
thi aur chiz zauq-e-tamasha kahen jise

manind-e-mah us ka falak par dimagh ho
jhuton bhi tab-e-husn mein tum sa kahen jise

sab aap ke taghaful-o-jaur-o-jafa baja
hai ek apna shikwa ki be-ja kahen jise

zauq-e-sukhan ke din bhi the shayad wahi ki jab
dil mein kasak thi dard-e-tamanna kahen jise

'mahrum' shairon mein bahut namwar nahin
itna zarur hai ki sab achchha kahen jise