pahnae-bar-o-bahr ke mahshar se nikal kar
dekhun kabhi maujud o mayassar se nikal kar

aae koi tufan guzar jae koi sail
ek shola-e-be-tab hun patthar se nikal kar

aaankhon mein damak utthi hai taswir-e-dar-o-baam
ye kaun gaya mere barabar se nikal kar

ta-der raha zaiqa-e-marg labon par
ek nind ke tute hue manzar se nikal kar

har rang mein isbaat-e-safar chahiye 'sarwat'
mitti pe dharo panw samundar se nikal kar