palkon ke tale jhil chhupae hue hun main
han dard ke dariya mein nahae hue hun main

aandhi ka ujalon se idhar rag chhida hai
aur khwahishon ke dip jalae hue hun main

hairan hun ye aaine mein kaun hai mujh sa
muddat hui hai khud ko bhulae hue hun main

ye khwab ki faslen ye khayalon ke baghiche
mausam ki nigahon se bachae hue hun main

tufan to dafna liya hai apne labon mein
par kuchh hansi ke phul sajae hue hun main