palkon pe sitara sa machalne ke liye tha
wo shakhs in aankhon mein pighalne ke liye tha

wo zulf hawaon mein bikharne ke liye thi
aur jism mera dhup mein jalne ke liye tha

jis roz tarashe gae ye zakhm usi roz
ek zakhm meri ruh mein palne ke liye tha

us khwab ki tabir mujhe milti bhi kaise
wo khwab to afsanon mein dhalne ke liye tha

jis rah ke patthar ko 'rawish' kos rahe the
wo rah ka patthar to sambhalne ke liye tha