parinda qaid mein kul aasman bhul gaya
riha to ho gaya lekin udan bhul gaya

mere shikar ko tarkash mein tir laya magar
wo meri jaan ka dushman kaman bhul gaya

use to yaad hai sara jahan mere siwa
main us yaad mein sara jahan bhul gaya

wo shakhs zindagi bhar ka thaka hua tha magar
jo panw qabr mein rakkhe thakan bhul gaya

gharib-e-shahr ne rakkhi hai aabru warna
amir-e-shahr to urdu zaban bhul gaya

tamam shahr ka naqsha banane wala 'raza'
junun-e-shauq mein apna makan bhul gaya