pata hun sahl zist ke mushkil safar ko main
kyon kar dua na dun but-e-diwana-gar ko main

chhoti si apni baat to afsana ban gai
jab bazm mein chhupa na saka chashm-e-tar ko main

ek ek qadam pe jhukta raha hai sar-e-niyaz
manzil hi apni samjha teri rahguzar ko main

ai saghar-e-hayat teri talkhiyan qubul
saqi ko sath paun jo lutf-e-nazar ko main

dam bhar ruka jo ishq ki manzil mein kho gaya
ek ek se puchhta hun ki jaun kidhar ko main

phir be-khudi se hosh ki jaanib hun badh raha
phir dhundhta hun aaj tumhaari nazar ko main

yun chhedta hun piri mein qisse shabab ke
phir dhundhta hun rakh mein goya sharar ko main

aae na wo 'habib' na dil ki kali khili
phir kyon na sham-e-gham kahun aisi sahar ko main