patte patte se naghma-sara kaun hai
ai hawa tere andar chhupa kaun hai

phul shabnam shafaq chandni kahkashan
parda-e-husn se jhankta kaun hai

maslahat-kosh wo to nahin tha magar
nutq ko hath se rokta kaun hai

itne badle hue hain ki hairat mein hun
mere pichhe mein un se mila kaun hai

na-umidi ne mujh ko muwahhid kiya
ab khuda ke siwa aasra kaun hai

ye 'tapish' ki ana hai nahin to yahan
gham ko hans hans ke yun jhelta kaun hai