patthar na koi dhul na kanta dikhai de
ye haalat-e-junun bhi tamasha dikhai de

hum ne nishan-e-qabr ko aaina kar diya
shayad kisi ko waqt ka chehra dikhai de

aisa na ho ki shauq se mahrum hi rahen
jo kuchh hamari aankh ne dekha dikhai de

ho kar bhi kuchh nahin hun agar hun to ai khuda
mujh ko mere wajud ka hona dikhai de

mana ki dubte ko sahaara bahut hai ye
ubhrun kisi bhi taur to tinka dikhai de

akhtar chakor dil ke mere mahw-e-raqs hain
ek mahtab jhil mein utra dikhai de