paya tha kuchh sukun dil-e-dagh-dar ne
zakhmon ko phir nikhaar diya hai bahaar ne

phir hai tere karam ki zarurat nigah-e-dost
aawaz di hai mujh ko gham-e-rozgar ne

aa ja ki dil dua na kare phir firaq ki
muztar bana diya hai tere intizar ne

ahl-e-khirad mein koi na mansur ban saka
diwangi ko aam kiya shauq-e-dar ne

'akhtar' na bujh sakegi wo sham-e-wafa kabhi
bakhshi ho raushni jise parwardigar ne