phir bahana koi banaya gaya
shakh se aashiyan giraya gaya

apne aangan mein raushni ke liye
zard patton ko aazmaya gaya

qurbat-e-aftab badhti gai
jal uthe panw sar se saya gaya

dar-ba-dar kar diya parindon ko
kat kar ped ghar banaya gaya

khak ne khak tak pahunchna tha
umr bhar rasta dikhaya gaya

zindagi kab guzarne wali thi
naqsh diwar par banaya gaya

raushni phutne lagi 'asim'
shiddat-e-gham mein gungunaya gaya