phir bhayanak tirgi mein aa gae
hum gajar bajne se dhoka kha gae

hae khwabon ki khayaban-saziyan
aankh kya kholi chaman murjha gae

kaun the aakhir jo manzil ke qarib
aaine ki chadaren phaila gae

kis tajalli ka diya hum ko fareb
kis dhundalke mein hamein pahuncha gae

un ka aana hashr se kuchh kam na tha
aur jab palte qayamat dha gae

ek paheli ka hamein de kar jawab
ek paheli ban ke har su chha gae

phir wahi akhtar-shumari ka nizam
hum to is takrar se ukta gae

rahnumao raat abhi baqi sahi
aaj sayyare agar takra gae

kya rasa nikli dua-e-ijtihad
wo chhupate hi rahe hum pa gae

bas wahi memar-e-farda hain 'nadim'
jin ko mere walwale ras aa gae