phir se tajdid-e-arzu kar len
aaiye kuchh to guftugu kar len

zindagi ke hasin dorahe par
kuchh tamanna-e-rang-o-bu kar len

doston se nibah gar chahen
dushmanon ko bhi hum subu kar len

jism-o-jaan ruh ko sanwar to den
aansuon se agar wuzu kar len

log fard-e-wafa jafa dekhen
aaina dil ka ru-ba-ru kar len

aib-ju nukta-chin adu hasid
apna daman to khud rafu kar len

phir wafa ho na morid-e-ilzam
zulm sahne ki hum bhi khu kar len

khud-numai fareb hai 'sadiq'
khud-shanasi ki justuju kar len