tujhe qasam hai mera eatibar rahne de
wafa ke nam se kuchh ikhtiyar rahne de

maqam-o-jubba-o-dastar ki nahin khwahish
nisar-e-jaan ho ye dil khaksar rahne de

na jaane kaun si manzil pe dam nikal jae
dil-e-hazin pe mohabbat ka bar rahne de

wafa ke nam ko ruswa na kar sake koi
surur-o-lazzat-e-gham ham-kanar rahne de

ye shokhiyan ye tafakhur riya hai sab be-sud
hayat kya hai faqat mustaar rahne de

kahin talash se apni na rok de mujh ko
ye waswase ye sawalon ka bar rahne de

na noch kar use sine se phenk de apne
kisi ki yaad ka kuchh kuchh khumar rahne de

gunahgar sahi hai to banda-e-'sadiq'
ghariq-e-rahmat-e-parwardigar rahne de