phir tere ochhe khayalat ne dil tod diya tanz mein dube khitabaat ne dil tod diya lab-kushai ki zarurat thi to khamosh rahe be-sabab ramz-o-ishaaraat ne dil tod diya main to ab lafz-e-mohabbat se laraz uthta hun teri is darja inayat ne dil tod diya main samajhta tha tere dil mein makin hun lekin tere andaz-e-mudaraat ne dil tod diya teri ghazlon mein nae daur ke uslub nahin tere farsuda khayalat ne dil tod diya mustaqil kaun tera sath nibhaega yahan ek do pal ke tere sath ne dil tod diya aap ki zat se thi mujh ko tasalli ki umid aap ke ashkon ki barsat ne dil tod diya wo mera dost bhi ho sakta hai jaani dushman kya bataun mere khadshat ne dil tod diya jin se ho jati hai iman se duri 'ajmal' aise afkar-o-nazaryat ne dil tod daya