phir tere qaul-o-qasam yaad aae
teri chahat ke sitam yaad aae

kis qadar chot lagi hai dil par
jab bhi mar mar ke sanam yaad aae

yaad jab aaya tera nam mujhe
kitne be-nam se gham yaad aae

jaane wo kaisa safar tha mera
jis ka ek ek qadam yaad aae

phir mera zehn hai uljha uljha
phir teri zulf ke kham yaad aae

aur bhi yaad ki lau tez hui
jab bhi chaha ki wo kam yaad aae

kaun 'betab' pukare hum ko
kis ko tanhai mein hum yaad aae