phir us ko dekhna ji-bhar ke chandni ke sang
phir us ke aks pe ek chand ka guman hona

phir us ki jhil si aankhon mein dubna mera
aur us ke sath hi barsat ka saman hona

ek ek kar ke sajaana gulab zulfon mein
phir us ke chehre pe surkhi si ek ayan hona

hain dil mein khwahishen itni ki kya kahen is se
nahin hai ras use mera raazdan hona

ye umr bit gai hai zamin pe rahte hue
kahan tha apne muqaddar mein aasman hona