phir wahi karb-e-guzarish wahi mansha apna
koi izhaar ki surat na taqaza apna

chehra-dar-chehra liye apne kiye ke tewar
jaane kis soch mein gum-sum tha masiha apna

aankhon aankhon ke ye zine ye talluq ki bisat
dil hi ilham hai aur dil hi sahifa apna

is mafajat-o-mukafat ke mamure mein
farz ya arz-e-munajat hai hissa apna

aks-dar-aks ki ek tarfa kashakash ka asir
maskh tha aaina-khane mein sarapa apna

be-tanabi bhi bagule bhi kashakash bhi wahi
kya hua dasht-e-tamanna mein bhi khema apna

khidmat-e-khalq ka aise mein tasawwur bhi kya
log sab kuchh hain sanbhaale hue apna apna

be-tuki baat hai ud jaegi be-par 'rahi'
tum ne likkha hai hawaon pe fasana apna