phir yaadon ka mausam aaya kai baras ke baad
jaane kyon darpan sharmaya kai baras ke baad

dil se kitna dur raha tha sukh sapnon ka ganw
aankhon mein sapna ankraya kai baras ke baad

mithi mithi khushbu wali sansen aati hain
bagiya ne mahuwa tapkaya kai baras ke baad

tez dhup mein tapti rahen pyas thi nange panw
nainon ne amrit barsaya kai baras ke baad

sanson mein bela mahka aur baalon mein juhi
jaise koi pahun aaya kai baras ke baad

aam ki chatni dhuli dal aur roti garm garm
aman ne chulha sulgaya kai baras ke baad