pila saqiya mai-khunuk aab mein
ki thamti nahin tauba mahtab mein

gaya din kaisa huzur-e-namaz
wo yaad aae abru jo mehrab mein

mile kuchh to zakhm-e-jigar ka maza
bujha kar rakha tegh zahrab mein

ilahi falak jis se phat jae de
wo tasir aah-e-jigar-tab mein

buland aashiyanon pe bijli giri
jo niche the dube wo sailab mein

wo uryan mein sarma mein thi jin ki shab
guzarti samor aur sanjab mein

na aae hon aazurda lena khabar
padi dhum ye sare punjab mein