purane sab nazare ja rahe hain
nae manzar ubhaare ja rahe hain

udhar hai sard-mehri aur idhar se
ishaaron par ishaare ja rahe hain

safina ho raha hai gharq-e-tufan
nigahon se kinare ja rahe hain

nahin baatin pe ab koi tawajjoh
faqat zahir sanware ja rahe hain

shab-e-gham mein rukh-e-raushan ke jalwe
andheron ko nikhaare ja rahe hain

kahin bikhri padi hai zulf 'afzal'
kahin gesu sanware ja rahe hain