pyar ka yun dastur nibhana padta hai
qatil ko sine se lagana padta hai

duniya ko pur-nur banane ki khatir
apne ghar ko aag lagana padta hai

but-khane yunhi tamir nahin hote
patthar ko bhagwan banana padta hai

duniya-dari ki khatir is duniya ka
jaane kya kya naz uthana padta hai

apne qatil ki masum nigahon se
dil ka har ek zakhm chhupana padta hai

aisa bhi waqt aata hai sardari par
angaron ko phul banana padta hai

aisa bhi hota hai hijr ki raaton mein
diwaron ko haal sunana padta hai

jin galiyon mein qatl hue arman 'wali'
un galiyon mein aana jaana padta hai