pyar mein us ne to danista mujhe khoya tha
jaane kyun phir wo akele mein bahut roya tha

us ko bhi nind nahin aai bichhad kar mujh se
aakhiri bar wo banhon mein meri soya tha

mere ashkon mein raha wo bhi barabar ka sharik
main ne ye bojh akele hi nahin dhoya tha

raat bhar tujh ko sunata raha mera qissa
raat bhar chand dariche mein tere goya tha

phul nafrat ke uge hain to tajjub kaisa
tum ne ulfat ka koi bij kahan boya tha

khat pe tapke hue aansu ye batate hain 'shakil'
meri tahrir ko barish ne nahin dhoya tha