pyas dariya ki nigahon se chhupa rakkhi hai
ek baadal se badi aas laga rakkhi hai

teri aankhon ki kashish kaise tujhe samjhaun
in charaghon ne meri nind uda rakkhi hai

kyun na aa jae mahakne ka hunar lafzon ko
teri chitthi jo kitabon mein chhupa rakkhi hai

teri baaton ko chhupana nahin aata mujh se
tu ne khushbu mere lahje mein basa rakkhi hai

khud ko tanha na samajh lena nae diwanon
khak sahraon ki hum ne bhi uda rakkhi hai