pyas meri hai aab us ka hai
ret us ki sarab us ka hai

raat aur nind hai meri khatir
khwab ka ehtisab us ka hai

hai zamin meri aur lahu mera
meri aankhon mein khwab us ka hai

wo kabhi dhup hai kabhi saya
aankh meri hijab us ka hai

nind meri hai us ki aankhon mein
meri aankhon mein khwab us ka hai

sab sawalat chikh ki surat
chup hi rahna jawab us ka hai

sher sare 'mujib' mere hain
han faqat intikhab us ka hai