qad ke lihaz se to sabhi aasman the
hum jaise ba-kamal magar be-nishan the

jite na the guzarte rahte the roz-o-shab
sansen na thin qadam-ba-qadam imtihan the

tanha nihatte ladte rahe zindagi ki jang
lashkar tha sath aur na tir-o-kaman the

ai ajnabi na puchh udasi ka majra
wo log kho gae hain jo basti ki jaan the

rishton ki unch-nich se waqif na tha 'hanif'
mere aziz mujh se bahut bad-guman the