qaid-e-kaun-o-makan se nikla
har nafas imtihan se nikla

main bujha bhi to mere baad yahan
ek dhuan kaisi shan se nikla

manzil gum-shuda suragh tera
panw ke ek nishan se nikla

shukr hai us ki yaad ka paikar
mere wahm-o-guman se nikla

ek thokar pe nur ka dariya
shab ki andhi chatan se nikla

baukhlai hawa ki tair-e-nau
kitni unchi udan se nikla

aag pani hawa aur mitti ke
'asif' har imtihan se nikla