qarar-e-dil fasana ho gaya hai
tumhein dekhe zamana ho gaya hai

tumhaare wada-e-farda ka hila
qayamat ka bahana ho gaya hai

purane doston ke ghar suna hai
tumhaara aana-jaana ho gaya hai

tumhaare zulm ke lal-o-gohar sab
hamara dil khazana ho gaya hai

duaen den mere sine ko un ka
bahut achchha nishana ho gaya hai

raisana ghazal hai bait-dar-bait
gharibon ka thikana ho gaya hai