qarar hote hue be-qarar yani main
tumhaare hijr ka ek sogwar yani main

watan se dur watan ka muqim yani tu
watan mein rah ke gharib-ud-dayar yani main

sarapa kibr wa sarapa ghurur yani tu
tere ghurur pe har dam nisar yani main

wafa-o-mehr-o-mohabbat ka nam yani tu
wafa-o-mehr-o-mohabbat shiar yani main

har ek amal se mere be-niyaz yani tu
niyaz-o-nazr dil-o-jaan-guzar yani main

ummid-e-amad-e-subh-e-bahaar yani tu
aur is bahaar ka umid-war yani main

sukhan mein taza khayalon ki mauj yani tu
sukhan ko bais-e-sad-iftikhar yani main