raat aa baithi hai pahlu mein sitaro takhliya
ab hamein darkar hai khalwat so yaro takhliya

aankh wa hai aur husn-e-yar hai pesh-e-nazar
shash-jihat ke baqi-manda sab nazaro takhliya

dekhne wala tha manzar jab kaha darwesh ne
kaj-kulaho baadshaho taj-daro takhliya

gham se ab hogi barah-e-rast meri guftugu
dosto timar-daro gham-gusaro takhliya

chaar jaanib hai hujum-e-na-shanayan-e-sukhan
aaj pure zor se 'faris' pukaro takhliya