raat baqi hai charaghon ko jalae rakhiye
ye sitare abhi palkon pe sajae rakhiye

ain mumkin hai yahan se koi isa guzre
amn ki lash ko kandhon pe uthae rakhiye

aag barsaega rahon mein ghamon ka suraj
apne hamrah duaon ke bhi sae rakhiye

baat niklegi to ahbab ki ghibat hogi
raaz-e-gham apna zamane se chhupae rakhiye

in se wabasta hain gulshan ki bahaaren 'zahid'
in gulabon ko khizaon se bachae rakhiye