raat ka har ek manzar ranjishon se bojhal tha
chand bhi adhura tha main bhi na-mukammal tha

aankh ki munderon par aarzu nahin larzi
ek charagh ki lau se ek charagh ojhal tha

ja mila tere dar ke gum-shuda zamanon mein
meri umr ka hasil pyar ka jo ek pal tha

kyun sulagti aawazen bhig bhig jati thin
dasht-e-na-rasai mein dhup thi na baadal tha

dur to na tha itna khema us ke khwabon ka
raste mein apni hi khwahishon ka jangal tha