raat ke pichhle pahar jis ne jagaya kya tha
koi aaseb-zada hijr ka saya kya tha

na to hum samjhe na ki koi wazahat dil ne
jaane apna tha ki wo shakhs paraya kya tha

ye to sach hai ki labon ne na koi jumbish kei
par nigahon ne jo paigham sunaya kya tha

yun samundar ka hawa se to koi rabt na tha
lahar ne phir bhi jo ye shor machaya kya tha

wo jo ehsas-e-talluq tha talluq ke baghair
us ne samjha na kabhi hum ne jataya kya tha