raat ke waqt koi git sunati hai hawa
shakh-dar-shakh bhala kis ko bulati hai hawa

sard raat apni nahin katti kabhi tere baghair
aise mausam mein to aur aag lagati hai hawa

ek manus si khushbu se mahakti hai faza
jab tu aata hai bahut shor machati hai hawa

kin guzargahon ke hain gard-o-ghubar aankhon mein
roz patjhad ke hamein khwab dikhati hai hawa

zindagi jalta hua ek diya hai 'anjum'
dekhna ye hai kahan ja ke bujhati hai hawa