raaz-e-dil kya zaban se nikla
ghar ka bhedi makan se nikla

kya mila haal-e-dil bayan kar ke
kya natija bayan se nikla

ho gaya ham-kanar-e-manzil-e-shauq
dil jo wahm-o-guman se nikla

raat khalwat mein chain se guzri
dil ka arman shan se nikla

aa gaya dil ka khun mizhgan par
dur-e-shahwar kan se nikla

jab kaha main ne aap aaenge
yak-ba-yak han zaban se nikla

honge donon jahan tah-o-baala
wo kabhi la-makan se nikla

wo ye kahte hain khinch lenge zaban
harf koi zaban se nikla

aah yun dil se sham-e-gham nikli
tir jaise kaman se nikla

lab khule rah gae sar-e-mahfil
kya kaha kya zaban se nikla

muft mein ai 'girami' khwar hue
kaam kya pasban se nikla