rabta rakh tirgi se raushni ko chhod de
jo aziyyat-nak ho aisi khushi ko chhod de

jaante sab hain ki is ke baad hai daur-e-khizan
kyun na daman-e-bahaar-e-zindagi ko chhod de

waqt apne aap mein ek fitna-e-bedar hai
waqt ke kahne pe koi kyun kisi ko chhod de

is se pahle tujh ko nazron se gira de ye jahan
man le kahna khudara be-hisi ko chhod de

waqt par 'anjum' na tere kaam aaega koi
doston se pher le munh dosti ko chhod de