rachi dimagh mein ho jis ke us badan ki bu
khush aawe kab use nasrin-o-nastaran ki bu

wo jis ne sunghi ho ek dafa us ke tan ki bu
na itr ki use bhawe na yasman ki bu

hazar jaan se mushk-e-khutan ho halqa-ba-gosh
jo sungh le kabhi us zulf-e-pur-shikan ki bu

basa ho dil mein bhala jis ke wo gul-e-khubi
pasand aae use kis tarah chaman ki bu

masham-e-jaan hui yaqub ki wahin taza
jo pahunchi misr se yusuf ke pairahan ki bu

kahan hai seb mein seb-e-zaqan ki si bu-bas
jahan mein ruh-faza hai to hai zaqan ki bu

masham-e-jaan ko tar-o-taza 'aish' karti hai
jahan ke bagh mein guldasta-e-sukhan ki bu