rah-e-gham se hayat guzri hai
muzmahil si baraat guzri hai

hae ye kis tarah guzarni thi
ban ke jo hadsat guzri hai

zabt-e-gham ho ki shiddat-e-gham ho
had se har ek baat guzri hai

de gae sath zindagi ka gham
umr kya gham ki raat guzri hai

dil pe aisi guzar gai hamdam
jaise ek wardat guzri hai

chhod kar ja raha hai kyon ai gham
zindagi tere sath guzri hai

ashk-bar hai hayat muddat se
raqs karti mamat guzri hai

kal tere sath na guzar jae
aaj jo mere sath guzri hai

jaise guzri ho ehtimamon mein
yun ghamon mein hayat guzri hai

us ke bin puchh mat ye 'ashraf' se
kis tarah kal ki raat guzri hai